Aventura e shkëlqyer në pankinën e Kombëtares Shqiptare nuk mund të kalonte pa u vënë re. Dhe puna e Xhani De Biazit, në drejtim të skuadër kuqezi, ka bërë që teknikut të mos i mungojnë ofertat nga klube të futbollit europian.
Vetë trajneri ka zbuluar në një intervistë për portalin italian “Tuttomercatoweb”, se një skuadër e huaj ka insistuar gjatë kësaj vere për ta bindur të ulet në pankinën e saj.
De Biazi nuk ka bërë të ditur emrin e klubit, por është shprehur se e ka refuzuar ofertën.
“Gjatë kësaj vere një klub i huaj më ka kontaktuar, por në këtë moment kam një mision: të mbyll eksperiencën time me Shqipërinë me një rezultat të rëndësishëm. Do të qëndroj, pasi shpresoj të realizoj ëndrrën e Europianit. Do të luajmë edhe ndeshjet e fundit dhe skuadra ka shumë dëshirë për të bërë mirë”, ka thënë Xhani De Biazi në intervistën e tij të fundit.
Kontrata e Xhani De Biazit me Federatën Shqiptare të Futbollit skadon në muajin Tetor të këtij viti, por sipas një klauzole kualfikimi për në Euro 2016, do t’i mundësonte automatikisht rinovimin.
Gjithsesi ky nuk duket një problem edhe në rastin më të keq. De Biazi ka mbështetjen e drejtuesëve të federatës dhe tifozëve pas ecurisë së shkëlqyer të kombëtares në këto eliminatore.
Shqipëria nuk ka asnjë humbje në Grupin I, ndërsa pas pikëve që i dha Gjykata e Arbitrazhit Sportiv për ndeshjen me Serbinë, kuqezinjtë kanë më shumë shpresa për t’u kualifikuar në finalet e turneut që do të luhen në Francë, verën e ardhshme.