Armando Vajushi është prezantuar tek Livorno. Së bashku me menaxherin e tij Sokol Haxhia, shqiptari është gati për aventurën e tij të re italiane, këtë herë në Serinë B.
Sipas Vajushit që vitin e fundit nuk ka luajtur fare: “Dua të demonstroj në këtë klub sa vlej dhe të rifitoj një vend në kombëtare. Me Kievon nuk luajta dot, ndaj vendosa të kërkoj një klub tjetër. Fatmirësisht, u bë i mundur huazimi te Livorno. Kam shumë falënderime për të gjithë tifozët e Livornos, për ngrohtësinë që kanë treguar ndaj meje, me mesazhet që më kanë dërguar këto ditë në rrjetet sociale, dhe shpresoj t’ua shpërblej në fushën e lojës. Tani shoh përpara, forca Livorno”, tha shkodrani gjatë prezantimit.
Mesfushori shkodran shpreson që falë lojës te Livorno të fitojë një vend në kombëtare, fanellën e së cilës e ka veshur disa herë në miqësore, por jo në ndeshje zyrtare. Armando Vajushi sqaroi arsyet se pse nuk u ambientua menjëherë te Kievo ku u transferua nga Liteksi. Armando Vajushi është shqiptari i dytë që do të luajë për Livornon ku është huazuar për 1 sezon me të drejtë blerje. Në sezonin 2007-2008 në ekipin toskan u aktivizua sulmuesi Erjon Bogdani. Livorno këtë sezon merr pjesë në Serinë B.